الجمعة، 29 مارس 2013

خواطر سوسنية(أهلا بالرومانسية 12)

قلبى عصفور صغير

تستطيع ان تضمه 

تحت جناحيك

لانه يشعر بالصقيع

والاغتراب والحنين

ويهفو اليك

قلبى عصفور صامت

فقد قطعوا لسانه

واخذو ا منه كل ريشاته

وتركوه فى العراء

يبحث عمن يدفئه

ويحميه 

ويضمه فى الداخل 

من البلل

قلبى صامت --حيران

يخفق ويرفرف --آسيان

يريد ان يطير

يطير---يطير

ويفرد كل الاجنحة

ويذهب الى هناك

حيث الدفء منثور

فى كل مكان

حيث البهجة

تحلق فى الانحاء    

الاثنين، 25 مارس 2013

خواطر سوسنية (مصر 56)








( الى مرسى)


روح بقى يا شيخ بلا رجعة

جبت البلد ورا وخليتها والعة

  
تسع شهور والبلد حبلى
 
بالخيبة والوكسة اللى بلا قفلة
 
خليت الناس كلها كفرت بالثورة

وبتقول فينك يا مبارك ياللى كنت مستتنا

وبتبنى لنا الكبارى والسياحة كانت فلة
 
دلوقت بقينا كلنا بنقول عشانا عليك يارب

وقريب قوى بالمناديل على النواصى

حتلاقى الناس سارحة

وعاوزين الجيش يتدخل بقى

ويلحق الكارثة

اللى ابتلانا بها على حين غفلة

مش هو مسئول عن تسليمنا

للى حايودونا كلنا فى داهية؟

يا سيسى البلد كلها وراك واقفة

يا تلحقونا بقى يا مش حايكون هناك دولة

وساعتها مش حايكون هناك للجيش لازمة

 لانه حايدافع عن ايه

اذا كانت مصر دلوقت مرفوعة من الخدمة

السبت، 16 مارس 2013

خواطر سوسنية(مصر 55)

الالم زاد قوى---ازاى حانستحمله؟


 
الالم زاد قوى--ازاى حانستحمله؟ 
 
 حانلاقيها من جنودنا اللى اتنشوا
 
 صايمين فى ضهرهم
 
 والا نلاقيها من بلاوى زرقا 
 
 حا تغرقنا كلنا 
 
 كلام زى الرصاص 
 
 داخل قلوبنا تنكوى
 
 مش عارفين فين الخلاص
 
 وامتى الكابوس ينتهى
 
 واللى يقول علينا خرفان
 
 واللى يقول علينا فيران 
 
 واللى يقول حايدخلنا الجحور 
 
 واحنا اساسا قمنا بثورة
 
 علشان نشوف النور
 
كدب وبذاءة وخديعة
 
كلها اخلاق وضيعة
 
وقافلة ايه اللى سايرة 
 
 كل المراكب واقفة
 
 والخيبة والانتكاسة
 
هما دولا النهضة
 
 مصر بترجع لورا 
 
 يادى الايام الحزينة
 
 وكل الكلاب السايبة
 
 قاعدة تنهش فى الغنيمة

الخميس، 14 مارس 2013

خواطر سوسنية ( اى كلام --1)

أه يا مارس ---أه يا ابريل

بيقولوا عليكو

بتيجوا فى الربيع

طب ليه دايما فيكو

قلبى بيكون حزين

تيجوا ومعاكم

سحب اكتئاب بديع

يوم نصحى بنضحك

ويوم نصحى معيطين

يوم نقول الحمد لله

كل شئ رائع وجميل 

وحظنا فى الدنيا ديا 

أحسن من ناس كتير

ويوم تانى بنصحى 

زهقانين ومزعببين

ونقول ليه حظنا 

ما كانش احسن شوية

ماللى انكتب على الجبين

يوم نقول بكره 

حايجيى اجمل اكيد

ويوم نقول يعنى

الخير حاييجى منين

يا مهون اهو نصف مارس عدى

عقبال ما نبقى -----30 ابريل       

خواطر سوسنية ( مصر 54)

فى سجون جمال عبد الناصر
 
فى سجون عبد الناصر
 
 عشنا كل الحرية
 
 تعليم وجامعة ومدارس
 
 من اسوان لاسكندرية
 
 ثقافة وفنون وكتب خانة
 
 خلقت وعى ووطنية 
 
 وسد عالى بنيناه 
 
رمز الكرامة المصرية
 
 تكافؤ فرص بين الغفير
 
 وابن رئيس الجمهورية
 
امال الشعب اماله
 
 خطط خمسية وعشرية
 
 ومش حاقولك ايه تانى
 
يكفى عدالة اجتماعية
 
 كل الرؤوس اتساوت 
 
 وشعرنا جميعا بالندية 
 
 والمصانع شرق وغرب
 
 وبنصلح كل الارض
 
 حتى اسأل النوبارية
 
 والا الوادى الجديد 
 
 وكل الارض المروية
 
 ناصر طلع مصر
 
من عصر لعصر
 
وكان ماشى بيها 
 
 من نصر لنصر
 
 كان عاوز كل مواطن 
 
 يعيش مرفوع الهامة
 
 ورفع العامل والفلاح
 
 لاعلى وأغلى مكانة
 
 ومنين ما تمشى فى افريقيا
 
حا تلاقى فى القلب علامة
 
 تقولك ناصر كان هنا
 
 ساعد وحرر دول  يا ما
 
 ناصر فى قلب التاريخ
 
 شعلة نضال وحرية
 
 حايفضل دايما فى قلوبنا
 
 رمز لكل الوطنية

الأربعاء، 13 مارس 2013

خواطر سوسنية(مصر 53)




سيدى المواطن---انت ولا حاجة


 
سيدى المواطن--انت ولا حاجة
 
 ومش على اجندة اى حد
 
 سايبينك تتكوى بالمشاكل 
 
 من غير ما يقدمولك اى حل 
 
 ايشى سولار وايشى بنزين 
 
 وصيف ساخن جايلك يجرى 
 
 وكهربا حايقطعوها عليك
 
 وفى النار نقلى ونشوى 
 
 ده غير كل مرة نشترى سلعة 
 
 نلاقيها عمالة تغلى وتغلى 
 
 والجنيه كان بيشترى حاجة
 
 والله ما بقاش يسوى 
 
 وكل يوم يخترعولنا حدوتة 
 
 نتلهى فيها ونسكت 
 
 مرة اعلان دستورى ومرة
 
 ضبطية عشان 
 
تبقى كملت
 
 وتبقى مصر حرب شوارع 
 
 وما تعرف مين فيها بيقتل 
 
 كل ده عشان الوقت يعدى
 
 يمر بينا واحنا فى توهة وتحدى 
 
 ونلاقى روحنا قدام الصندوق 
 
 وتبقى الخيبة  قوية 
 
ومصر ساعتها تموت 
 
أو  تروح فى غيبوبة ابدية

الثلاثاء، 12 مارس 2013

خواطر سوسنية ( مصر 52)

تنويعات صغيرة فى حب مصر

(1)  السادات

يا سادات انعم بالجنة
 
شهيد فى يوم عرسك 
 
جبت النصر 

 وجبت الارض 

ومشفناش زى شجاعتك 

 علشان بلدك رحت هناك

 اتحديتهم وقريت قرأن

بطل فى الحرب 

بطل  فى السلام

 مين يطول ابدا هامتك 

وطنى اصيل من اللى انقرضوا

وماعدتش الاصناف دى  بيتولدوا

  مابقاش فاضل لنا

 غير أنطاع قعدوا وركبوا


(2)  على الطريق

على الطريق واحنا ماشيين
 
 قابلنا واحد عباب الله
 
 بوش سمح وقلب حزين
 
 عاللى جرى واللى حايجرى
 
 وقال مبادرة عاوزينها
 
  دكتور كتاتنى يقوم بيها
 
 يروح لحد المعارضة
 
ويشوف ايه يرضيها
 
 هى لوغاريتمات يا با
 
 ما قالوا سبعين مرة
 
 
فيه 50 مادة
 
 عك فى عك نغيرها
 
 وحكومة قنديل مش نافعة
 
 عاوزين حكومة تكون قادرة
 
 ونائب عام يجيى غيره
 
بطريقة صح قانونية
 
 والكل يشيل ايده
 
 من المحكمة الدستورية
 
 والانتخابات ضمانات ياما
 
 
منها الرقابة الدولية
 
 يا عم انت  يا طيب
 
مفيش حاجة راح تحصل
 
ومفيش اى مناقشة
 
مع الاخوان راح تنفع
 
 ده قطر ماشى فى طريقه
 
 عاوز للصندوق يوصل
 
 
 وكل كل مطالبنا
 
 بيفتكرونا انجازاتهم
 
 عاوزين نهدمها
 
 طريقنا مسدود وياهم
 
 والفوضى جاية على مزاجهم
 
 




(3)كلمات----------كلمات------------كلمات        


كلمات كلمات كلما ت 

لا نأخذ منهم غير الكلمات

 ووراء الكلمات 

تأتى الخيبات 

وتأتى السقطات

 وتأتى كل المفسدات 

بقعة زيت نكذب ونقول مفيش حاجة

 والبقعة ماشية فى النيل

 سعيدة ونشوانة

وجراد من 4 شهور

 بيقول انا جاى فى الطريق

 خرجوا علينا اللى بينفوا

 وماحدش قاله مفيش ليك سبيل

وقالوا احنا هنا صاحيين ومصحصحين

ومفيش جرادة

حاتخش مصر ليوم الدين

وادى النتيجة يا سادة

الجراد لاقاها غاغة

 ووكالة من غير بواب

قاللك اخش اتسحب

الاكل هنا كويس
 
  وراح يزور الريس 

وسرح على المطار

هاجج من وش الغباوة

وقالتلك الزراعة موتنا كام جرادة

 سبعتاشر الف وخمسمائة وحاجة

والجراد يا عمى بيمشى بالملايين 

تموت لك سرب

يطلع لك سربين 

يادى الخيبة القوية 

بلدنا بقت مهلبية 

والناس مش لاقية تاكل

قال ايه والجراد حايكمل على البقية

السبت، 9 مارس 2013

خواطر سوسنية( مصر 51)

قبل ما يفوت الاوان 

طال الصبر طال

واللى بيحصل ده محال

البلد عمالة تنهار

واحنا كمان وياها بننهار

لسه كتير عالحال ده يا با

ومفيش حلول هنا حاتنقال

يا عالم الحقوا مصر الحقوها

قبل ما تبقى فى خبر كان

ولو فى ايدينا حاجة نعملها

قولولنا حانقوم بيها قوام

وامانة يا ناسنا امانة

قولوا لمرسى يعمل حاجة

قبل ما يفوت الاوان   

الأربعاء، 6 مارس 2013

خواطر سوسنية (مصر 50)


مش عارفة ليه فجأة

سكت كل الكلام

 وماعدش فيه حاجة
 
فى اللى بيحصل تتقال 

 مصر فيها مؤامرة

 شغالة تدمير فيها 

 والامور كلها فوضى 
 
وماعدش تحكم فيها 

 كل مفاصل الدولة

 بتتكسر قدام عينينا 

 وجمهوريات الموز 

 اللى بيتحاكوا عنها

 بقت افضل بكتير 

 من اللى حاصل حوالينا

  كل شئ مزيف فى عينينا

  انتخابات سابقة كلها

 حتى اللى جاية تجرى لينا 

 مؤامرات مؤامرات 

 بتتدبر فى المغارة كل ليلة 

 مؤامرة كاسحة عالشرطة
 
لاجل تسقط ويداس عليها

 وانفاق عالبحرى 
 
زعلانين ومش عاوزين يسدوها

 واحكام القضا بيشربونا ميتها

 بعد مايكونوا بلوها 
 
والحاكم بيقول لشعبه

 اقبلونى انا وجماعتى 

 لاسيب عليكم الامر بالمعروف 

يوروكوا الويل ويربوكوا

اللى عارف بكره ايه حايحصل 
 
ارجوكم اتوسل اليكم

 والنبى اخبرونا