خواطر سوسنية(مصر 130 ---من النهارده ليوم الانتخاب)

من النهارده ليوم الانتخاب/ حاننادى عليكم يا احباب/ ياللى خرجتوا وبهرتوا الدنيا / ووقفتم لكل الذئاب/ ياللى صرخة واحدة كانت على لسانكم/ تحيا بلادكم رغم انف الاعداء/ من النهارده ليوم الانتخاب/ حاننادى على اللى عنده وطنية/ واللى رغم الزمان / مافقدش النخوة والرجولية/ حاننادى على كل مصرى / شارب من مية نيل/ شرب منها كل الاجداد/ من النهارده ليوم الانتخاب / حاننادى عليكم يا احباب/ يللى وقفتوا فى كل شارع / بتعلنوا العصيان/ وبتقولوا لكل خاين/ وقابض تمن الاوطان/ مالكش مكان معانا/ روح اشتريلك وطن ومكان/ وابقى اترحم على دقيقة قضيتها / وانت نايم ملء الاجفان/ تحت سما وارض بلادك/ وبين اصحابك وكل الاحباب/ من النهارده ليوم الانتخاب مش راح ازهق ولا امل / وحانادى فى كل طلعة شمس / على اللى بيجرى فى عروقه دم/ واللى خايف على بكره ييجى / ما يلاقيش حد واقف مستنيه / بيصنع مستقبله بايديه / ومصيره هو اللى بيبنيه/ من النهارده ليوم الانتخاب / حادق على كل باب/ من النهارده ليوم الانتخاب/حادعيكم يا احباب / مصر النهارده بتناديكم / اخرجوا بقى اعملوا اللى عليكم / علشان ما حدش يرجع يندم / ويقول يا ريت اللى جرى ماكان///

خواطر سوسنية( مصر 130-تغيير محافظ البنك المركزى بعد عك سوق الدولار

ومنين نجيب ناس وطنيين / ومنيين نجيب ناس فاهمين / ومنيين نجيب ناس لتراب الوطن حافظين / اين الكفاءات يا مصريين / ياللى بره واتربيتوا من خير البلد دى / وعارفين انكم للمسئولية شايلين / تعالوا مدوا ايديكم / بلدكم فى احتياج لكل عقل وكل ايد / ده الوقت اللى تردوا فيه الجميل/ وترفعوا من شأن بلدكم وتشيلوا اللى احنا فيه / اقتصادنا مدهول / ومفيش حد عارف ياخد خطوات فيه / سياحتنا فى الباى باى وعاوزه جهد جهيد / يالا بقى وروونا الهمة / شمروا وحطوا الايد فى الايد / نفسى اغمض وافتح عنيا / الاقى الخير واصل لعم محمود فى الغيط/ واللى على السقالة / طالع وهو سعيد / نفسى الاقى خضرة وصبيحة / قاعدين فى بحبوحة والضحكة عالخدين/ نفسى امشى فى الشارع / ماالاقيش حد بيمد الايد / والاقى القهاوى فاضية / والشباب كله شغيل/ مش امشى الساعة 12 الضهر / الاقى الشوارع بتستغيث / وساعتها باسأل نفسى / دول كلهم رايحين فين / ومش فى اشغالهم ليه / وفى الشوارع كده متنطورين / يارب خرج بلدنا / من عنق الزجاجة اللعين / وفجر يارب خيرنا / وكنوزنا اجمعين///

6 hrs ·

Privacy: Public

خواطر سوسنية ( مصر 129)-----خرجت الجمعة اتفسح

خرجت الجمعة اتفسح / ازور اصحابى واستمتع/ بجو اصبح لطيف/ وانا فى طريقى عديت / فوق كوبرى قصر النيل / ولقيت نفسى بكيت / وبادور عالمنديل/ اصلى لقيت علم بلدى مرفرف بجناحين / ولقيت الكوبرى مزهزه / وشباب شكله يفرح/ واقف عالجنبين/ كل حاجة كت طبيعية/ والنيل بيلمع عالشطين/ افتكرت ايام سودة/ ضلمة --متاريس --دخان/ والاقى سميراميس مضلم /ومفيش اى سياح/ وطوب وشماريخ وهباب/ وعيال شبه الشبيحة/ متلثمة باللثام/ والكوبرى مضلم وكأنه طريق الاشباح / كنت ساعتها برضه باعيط / وباقول بلدنا راحت فين/ وايه اللى بيحصل ده / والمجرمين دول منين / ومفيش ياربى نهاية لكل اللى احنا فيه؟ / وكنت بارفع ايديا اتوسل لربنا/ وقلت يارب انت تكفلت بحفظنا/ وقلت مصر باقية رغم أنف عدونا /يارب حد ييجى من وسطنا/ يطلع قدام الصفوف / نمشى وراه كلنا/ يطلعنا من البير اللى وقعنا فيه من كام سنة/ وباب السما اتفتح / وربنا ما كسفش رفعة ايادينا كلنا/ وبعت لمصر راجل/ استنيناه كام سنة / شارب من ميه نيلنا / واكل مما تنتجه  ارضنا / راجل ما جابتوش ولادة / ويجيى كل كام مليون سنة/ وبندعى من قلوبنا / ربنا يحفظه وينجيه من كل العدا