نفسى امشى فى الشارع
ألاقى الناس فرحانين
مظأططين
شاريين هدوم جديدة
ومعيدين
نفسى الاقى الضحكة صافية
عالوشوش الشقيانين
وألامل فى بكره باين
جوه العيون الحلوين
امتى حانفرح بقى
ونحس بدخلة عيد
بيقولوا العمر لحظة
تقضيها وانت سعيد
واحنا طال انتظارنا
والشوق عمال يزيد
لا الفرح دق بابنا
ولا شفناه جاى من بعيد
احنا فاتحين احضانا
ماسكينله شموع عالطريق
تعالى يا فرح تعالى
حانعلقلك التعاليق
