خواطر سوسنية ( مصر 87)

نزلو البنات -------نزلوا البنات
 (11 سنة سجن لفتيات الاخوان)


نزلوا البنات ---نزلوا البنات

 واستخبى الرجالة ورا الستات

 وسموهم سبعة الصبح
 
 والناس نيام نيام

 قالولهم انزلوا وخبوا السكاكين تحت النقاب والحجاب

 وكسروا العربيات

 واضربوا فى المحلات 

 وان قدرتم تولعوها

 اضرموا النيران

 واستخبى الرجالة كما  النسوان 

 وسابوا البنات فى وش الميدان

 ولما اتمسكوا مشاريع الارهاب

والقاضى حكم بالعدل والقسطاط

 ولولوا الولاد

 وقالوا دول بنات 

 طب هربتوا ليه يا اشاويس 

 ياللى الشنبة فى وشكم عيرة  يا قراطيس

 لما النخوة واخداكم

 والرجولة واجعاكم 

 كنتم ليه بتدفعوهم اول الصفوف

 وترسمولهم الخطط

 وتدوهم السيوف 

 بلا وكسة على الرجالة 

 بلا خيبة على المتعوس

يخرب بيت الفلوس

 بعتم الوطن بكام يا مجرمين 

 يا خونة يا قابضين 

 ايش تساوى الدنيا من غير مصر----يا ملاعين

خواطر سوسنية (مصر 86)

خونة وعملاء

 

 

خونة وعملاء والخيانة فى دمهم

 

 حماس ربيبة اسرائيل 

 

 ومنفذة احلامهم

 

 صهيونية مع صهيونية

 

 اتحالفوا مع بعضهم

 

 مؤامرات وتحالفات 

 

 الشيطان يركع لهم 

 

 يرفع لهم قبعته 

 

 ما هم فاقوه فى مكرهم 

 

 لكن ارضنا ديا 

 

 تجلى فيها ربهم 

 

 ووعدنا فى القرأن 

 

 ليوم القيامة متأمنة

 

 دى المحروسة اللى 

 

حارسها ربنا

خواطر سوسنية(مصر 85)

يا حلاوة النخبة يا حلاوة

يا حلاوة النخبة يا حلاوة

 نخبة لجنة الخمسين 

 صدعوا دماغنا ياما 

 من ايام ثورة الخامس والعشرين 

 عاوزين دولة القانون 

 والقانون فوق راسنا يا با 

 وليه مفيش قانون

 ينظم التظاهر عندنا

 هيا امريكا وبريطانيا وفرنسا احسن مننا 

 ويا حكومة ساكتة ليه

 ما تدرسى وتقررى وتكتبى

 وبعد ما يموت الف واحد

 والاخوان عاثوا فسادا

 وشوارع خساير بالملايين 

 وارصفة بتتقلع وتضرب فى العين 

 وتدمير مبانى وخلع شجر

 ومولوتوف ونار بتحرق وطن

 قامت الحكومة وسمت 

 وقالت قانونى اهو /

راحت النخبة قامت 

 علشان شوية فوضويين 

 وجمدت العضوية 

 تقولش هيا تكية 

 بدل ما يقولوا طبقوا القانون 

 وارحموا مصر شوية/

انتم بتشتغلوا لحساب مين 

 لمصر والا الخارجين 

 عن القانون المارقين 

 مش هى دى دولة القانون

اللى بتحكولنا عنها سنين وسنين 

 ليه لابسين مليون وش 

وكلامكم ليه بمعنيين 

 وليه بتقولوا الحاجة 

 وترجعوا فيها ليه 

 تبقى الفوضى جاية على مزاجكم 

 وتوليع البلد مريح حبايبكم 

 يبقى يا خيبتى وياحوستى ويا لوستى

 منين نجيب نخبة للبلد حابين 

 منين نجيب ناس فى التراب دايبين 

 بدل بدل ملبوسة ومقمعين 

 ومن جوه البدل 

 خيالات مأتة مخيفين

خواطر سوسنية (مصر 84)

(الاخوان المجرمون يحرقون العلم والمترو)

الله يحرق قلبكم 

 دى فلوس ودم الشعب الغلبان

 دى مرافق من زمن كان

 علشان تعرفوا ان انتم مش من هنا

 وان شعبكم فعلا غير شعبنا

 لو كنتوا مننا 

 ما تحرقوش قلبنا 

 لو كنتوا مننا 

 كنتم حبيتوا ارضنا 

 لو كنتم مننا 

 كنتوا عرفتوا قيمة الدم

 ويعنى ايه حرمة تراب الارض

 كنتوا عرفتوا يعنى ايه كلمة وطن 

 وكمان عرفتوا يعنى ايه كلمة علم

 كنتوا عرفتوا ان مائة الف شهيد

 راحوا فدا رفع العلم

 ولما رفرف علمنا على سينا 

 دفعناله  احلى واغلى تمن 

 نسرنا حايفضل فوق  فى السما

 رافع رؤوسنا كلنا

 وانتوا حاتروحوا اكيد اكيد

 فى الوبى

خواطر سوسنية(مصر 83)

شيلوا الكلمة دى من القاموس-------------ما تحرقوش دمنا
 (بعد اغتيال المقدم محمد مبروك)


شيلوا الكلمة دى من القاموس

 ما تحرقوش دمنا

 لسه الدم المراق

 ما بردش فى ارضنا

 لسه كلام امه 

 بيخرق ودننا 

 ما عنديش غيره يا ناس

 لا ولد ولا بنت

 كان بيسأل عليا صبح وضحا

 مين ليا  بعده 

 فيه ايه بعد الضنى

 هما اختاروا طريقهم 

 ارهاب اسود للنهاية

 وقبر وجودهم 

 بيعمقوه كل مادا 

 اسأل مصرى مصرى

 حايقولك  ماحدش يتكلم 

 هما اختاروا الابادة

 دول ولا الشياطين 

 كنا عنهم غافلين 

والحساب قرب قوى

 ربك امهلهم كفاية 

قتلوا وتأمروا وباعوا مصر  فى سوق النخاسة 

  بس مصر محروسة بايد خالقها

كل ما تيجى تقع يسندها

 عمار يا مصر يا حلوة يا بغاشة 

 ما هى حلاوتك دى اللى جايبة لنا  العدا

  حواليك من كل باحة 

خواطر سوسنية( مصر 82)

عاوزينا نكرهك 

وبيكرهونا فيك

 وكل ما يعملوا كده

 نزداد حب ليك

 كل تسريبة جديدة 

بتبين لنا قد ايه

 كمية الاخلاق جواك

 ومبادئ جيشنا العظيم

 يا سيسى احنا وراك

 وايدينا ممدودة ليك

 واوعى فى يوم تخذلنا 

او تحسب حساب بره حايقولوا ايه

 احنا حانختار رئيسنا

 زى ما اخترنا طريقنا

وشايفين رجال الوطن

 مهلهلين قد ايه

 ده قابض وده مرتشى

 وده عينه حايكسب ايه

 زهقنا بقى من الجواسيس

 والخونة وبايعين الارض

 زهقنا من اللى وشوشهم

 متلونة ومدهونة و بياعين الدين

 اشى حرباية واشى ناشطياه

 واشى صربيا وبولندايه

 واشى بعد ما اهله كانوا القبقباب لابسين

 ركب فور ويلز وسكن على النيل

 حاجة تقرف يا عالم

 البلد اتملى بياعين

 علشان كده يا سيسى

 انقذنا من الخاينين

 كونك من جيشنا

 بيطمن الملايين

خواطر سوسنية (مصر 81)

 هو فيه اهم من الوطن

هو فيه اهم من الوطن 
 
يطول نفسنا من اجله؟ 

 مش حانزهق مش حانطهق 

 مش حانقول الا من نهاية
 
اصل لو سبنا الوطن

 حد يقولى حانروح فين ؟ 

 ومنين نجيب ميه 

 حلوة على الشطين 

 ومنين نجيب ضلة  

ومنين نجيب نسمة

 هفهافة على الخدين

  مؤامرات مؤامرات 
 
مليارات نازلين فيها دفع 
 
لناس مش فاهمه حاجة

 مش عارفه انها بتستغل
 
الفلوس عمالة بتتكلم 

 تهدم جدار

 تهدم منار

 تهدم كل شئ حلو

احنا اتفاجئنا يا جماعة 

 واتاريهم بيرتبوا من زمان
 
دول عاملين مدارس 

 علشان يطلعوا فيها اجيال

 وعاملين مصانع 

 علشان ينموا فيها الاموال

 دول بيخططوا 

 لميت سنة قدام
 
دول عاملين دولة جوه الدولة 

 ونازلين تخريب وبلاوى واهوال

 ربنا ورانا اية

 فى 30 يونيه اللى فات

 وحايقف معانا 
 
لان دى الكنانة

 مش حانفقد الامل 

 دى معركة كرامة 

 نكون او لانكون 

 وحانطلع للمستقبل 

 مهما دفعنا ضحايا

 دمانا فدا مصر 

 ايه اغلى منها 

مفيش طبعا----لالا

خواطر سوسنية ( مصر 80)

الله يخرب بيوتكم ياللى غرقتونا

 
بادعى عليكم من كل قلبى

 ياللى غرقتونا

 وفى مرسى وجماعته دبستونا 

 قبضتم كام يا مجرمين 

وبعتوا الوطن لمين؟

 قلنا لكم ما تنتخبوش الاخوان

 قلنا لكم دول ارهابيين 

 قلتوا عليهم دول ناس طيبين 

 قلنا لكم اقرأوا التاريخ 

 واعرفوا حاتتعاملوا مع مين 

 لا بتقروا ولا بتسمعوا وتقولوا احنا حرين 

  ايه الحال دلوقت 

 يا امرا يا حلوين

 نازلين تقتيل فى الشعب 

 وتخريب بالملايين 

 وكل يوم مؤامرة 

 وخيانة وعملا سافلين 

 وزرعولكم فى كل حتة 

 واحد والا اتنين 

 علشان حتى لو مشيوا عن السلطة

 يفضلوا المخربين 

 ربنا ينتقم منكم 

 انتم وهما اجمعين

خواطر سوسنية ( مصر 79)

الاخوان خططوا لا ستخدام  كلاب بأحزمة ناسفة
حتى الكلاب البريئة المسكينة لم تسلم من شرورهم

 

الناس دى معمولة من ايه؟؟

----وملة ابوهم ايه؟؟

----مش ممكن يكونوا مسلمين ---

--مش ممكن يكونوا مصريين ---

---مش ممكن اصلا يكونوا بنى ادمين.

خواطر سوسنية ( مصر 78)

يا عينى -----يا ليلى --------على الهوية

اه يا عينى على الهوية

 اه يا ليلى على الهوية

 دى كده زى الديمقراطية

 وزى كمان الملوخية

 نفس الوزن ونفس التقنية

 يعنى كلام مالوش لازمة

 وبيخبى وراه الاهداف الحقيقية

 حزب النور عاوزها دولة دينية

 وعاوز يضحك تانى على الامة المصرية

 ويحط لنا فخ متفخخ

 على شكل مادة دستورية

 وكأن الثورة قامت

 علشان مصر يا ولاد

 كانت بتبحث عن هوية

 لا يا اسيادنا يا سلفية

 مصر من 7 الاف سنة

 وهيا عارفة الهوية

 افريقية فرعونية

 مسيحية اسلامية

 مصر دى البلد

 اللى علمت البشرية

 مش مستنية السلفية

 يدورولها على هوية

خواطر سوسنية ( مصر 77)

يا عبد الودود يا اخويا

بابعت سلامى لكل عبد الودود

 المرابض عالحدود

 يحمى ارضى ويحمى عرضى

 ويحمى سما ارض الجدود

 من قلب أختك المصرية

 اللى بتتشرف بيك

 من قلب أمك المصرية

 اللى طبعا خايفة عليك

 من قلب الايد اللى كبرتك

 ووصتك عالارض

 ما تنام ولا تهدا

 وتحافظ على العهد

 ما تسيب يوم سلاحك

 ده احنا هنا فى العمق

 مطمنين لوقفتك هناك

 ويقظتك وصحيانك

 عارفين انك راجل

 المهام الصعب

 والمستحيل كلمة

 ما تتقال ابدا

 على دى الارض

 يا عبد الودود يا خويا

 كل عيد وأنت طيب

 ورافع راسنا

 وجايب المجد

خواطر سوسنية (مصر 76)

كبطل فاضل لنا مع ابطال 73


كان نفسى اقول لمبارك

عاوزين نحتفل بيك

 انت وكل الابطال

 الفاضلين لنا من 73

كان نفسى اقوله 

 انت بطل الابطال

 زى اخواتك الباقيين

 نفسى اقوله لولاك انت

وكل الرجالة والشهدا المغاوير
 
يا ترى كنا حانبقى دلوقت فين؟

لكن مش قادرة اقولك حاجة

 ما انت زعلتنى وزعلت 

 كل المصريين

وبعد ما اديتنا النصر

 وشوية انجازات تانيين

 نيمت البلد نومة

 وخليتها عيشتها سودة

 والشباب كله قاعد حزين حزين

 والبطالة بتنهش فيه 

وكل الحرامية رجالتك

 نهبوا البلد كلها

 وما خلولنا الا الطين

 دى حتى الارض والطين 

 كانوا بيسرقوها ويوزعوها بالملايين

 لكن مع كل ده بارضه باقولك

 كل سنة وانت طيب

 وربنا غفور رحيم

خواطر سوسنية (مصر 75)

قيدوا شموع العيد وغنوا لمصر

 

 

قيدوا شموع العيد وصلوا لمصر 

 

 تفضل كده مرفوعة الراية

 

 واخلص ولادها اللى جابوا النصر

 

 فى قلوبنا دايما وفى اعلى مكانة

 

 قيدوا شموع العيد وغنوا لمصر

 

 دى دموعنا وقلوبنا هى اللى حافظاها

 

 ومهما العدا حاولوا معاها الكسر

 

على بابنا ياما اتكسرت دول ياما

 

ومافى حد حاول يجيى عليك يا مصر

 

 وخرج منصور من عركتك لا لا

 

 انت بلدنا واجدادنا رملة ترابك

 

 انت بلدنا و كل مستقبل ولادك

 

ولما نبعد عن نيلك والا سماكى

 

 بنشعر اننا خلاص خرجنا من الدنيا

 

 وكأننا شجرة مزروعة مجدورة

 

ما تقدرش تعيش فى اى بلد تانية 

 

 ماتقدرش ابدا تبعد عن هواكى

 

هو اللى يحيينا وبعده بيقتلنا

 

 قيدوا شموع العيد وغنوا لمصر 

 

 اصل اللى بنى مصر

 

 كان فى الاصل-------------مغنواتى

خواطر سوسنية (مصر 74)

((الدولة المصرية العميقة))


 نشكرك يا دولة يا عميقة

 ياللى وقت الجد انقذتينا

 من اللى غرقونا

 وورا الشمس

 كانوا حايودونا

 نشكرك يا دولة يا عميقة 

 علشان دولة مؤسسات 

 مليانة رجال الوطن 

 العميقين المخلصين

 اللى وقت الخطر 

 هبوا كما التنين

 وانقضوا على الخونة

 الاندال المجرمين

 اللى باعوا تراب الوطن

 بشوية ملاليم

 ايه يعنى 25 مليار دولار 

 قصاد رملة من ارضك يا مصر 

 ياللى فلوس الدنيا 

 ما تشترى فى ارضك خص

 دى نسمة هوا ك هنا

 وهى جاية ساعة العصر 

 وشربة نيلك  شفا 

 للتايه فى بحور الهم

 يا مصر يا عميقة

 بنحبك وعاوزينك تزدادى عمق

 مادام عمقك هو 

 اللى بينقذنا ساعة الجد

خواطر سوسنية (مصر 73)

محروسة ----يا محروسة

محروسة ---------يا محروسة

يا ست الكل ----------يا عروسة

خمس مرات فى القرأن-----مذكورة

وكل الانبيا على ارضك

خطاوى رجليهم-----------محفورة

كل اللى عاداكى --راح فى الوبى

وفضلت انت-------منصورة

يا ناس ما تخافوش على مصر

دى فى السما------محفوظة

احنا اللى نحتنا فى الصخر

وسبناه للزمن ---اعجوبة

وكل يوم على ارضك

معجزة --وراها معجزة------مكتوبة

محتارة فيكى العدا

ومش عارفين ان رب العرش

هو اللى حاميك

تعيشى يا مصر

ورايتك فى السما

عالية ومرفوعة

تعيشى يا مصر

وارادتك حرة -------------ومصونة 

خواطر سوسنية (مصر 72)

حتما -----------ولابد ----------ولازم

حتما ولابد ----ولازم

 

 نخلص من الارهاب 

 

 حتما ولا بد ولازم

 

 نرجع للانتاج

 

 واول خطوة نخطيها

 

 نخلص من كل الخونة

 

 ونكشف زيفهم وخداعهم 

 

 نكشف كل اوراقهم

 

 ونقول ده كلب ووضيع

 

 وده كان متخابر وعميل

 

 نكشف كل الطوابير 

 

 كل ما نطلع خطوة لقدام

 

 يربطوا بسلاسل اقدامنا

 

كل ما نبص على المستقبل

 

بحبل يشدوا فى رقابنا

 

 علشان نفضل دايما فى الماضى 

 

ونعيش جوه اوهامهم

 

 اوعى حد يمد ليهم ايد

 

 تتقطع اليد اللى بتتمدلهم

 

 

هواحنا ايه ياجماعة 

 

ما بنتعلمش الدرس

 

 والجحر اللى لدغنا ياما

 

نرجع تانى لنفس الجحر

 

 عاوزين يا بلدنا رجالة

 

 صامدين كما اجدع صخر

 

 حالفين ليعدوا بينا

 

لو حتى البحور السبع

 

خواطر سوسنية (مصر 71)

ماكين وجراهام عادا بخفى حنين ------وماكين يقول ما حدث بمصر انقلاب 

قالوا انقلاب --قالوا انقلاب

 قلنا انقلاب واحنا راضيين 

 لما 30 مليون مصرى 

ينقلبوا على رئيس وجماعة فاشلين

 تبق ثورة --قام بيها الجميع

 والجيش وضع ختمه 

لما شاف الملايين 

 باع جزء من سينا

 وجاب الارهابيين 

 وكان حايضيع حلايب وشلاتين 

 ده تخابر مع بره 

 واسرار عسكرية شاهدين

 ديمقراطية ايه اللى جايين بيها ملوحين 

 بلا ديمقراطية بلا ملوخية 

ارجعوا لبلادكم خائبين 

 دى مصر مش تورا بورا

 فاهمين والا مش فاهمين

خواطر سوسنية (مصر 70)

السيسى يقول اهم حاجة عنده حب الناس له

اذا كان على حب الناس

 الحب ليك كبير قوى

 اذا كان عالاخلاص

 حسيناه من اول كلمة قلتها

 اذا كان عالوطنية

 مش حانتكلم

 مفيش غيرك قدر يحسها


 يا سيسى احنا بنحبك

 عشان انت المصرى

 اللى زينا كلنا

 اللى لما بيتكلم

بيفهمنا وبنفهمه

اللى لما بنتألم

 بيكون قلبه شايل جرحنا

 واللى كلامه بلسم

 شايل الفرحة والهنا

 يا سيسى احنا فى ضهرك

 خلف قائدنا كلنا

 بس انت اوعى تسلم

للى عاوزين يخطفوا مصرنا

 خليك شديد ولا يهمك

 كرامتنا فوق كل العدا

 خلصنا من الارهاب

 ورجع سينا لنا

 وامشى معانا

  فى طريق مجدنا

 ده احنا ما صدقنا تيجى

بعد الشقا والضنى 

وقلنا ربنا رضى عنا

بعت لنا بطل احلامنا وحبنا

اديت لنا امل فى بكره 

بعد ما خلاص 


فقدناه كلنا

وقلنا دى مصر رجعت حرة

بعد ما احتلوها اللى مش مننا

يا سيسى احنا معاك

ووراك لاخر مدى

خواطر سوسنية (مصر 69)

من غير صندوق

 

 وديمقراطية وملوخية

 

 الشعب بنفسه طلع

 

 يقول فين الشرعية

 

 الشرعية مع جيشنا

 

 مع القوى التقدمية

 

 مع اللى عايزين بكره

 

 خير وتقدم وحضارة ومدنية

 

 ايمان بالارض الحرة المصرية

 

 من غير صندوق ووجع قلب وسكر وزيت وتقلية

 

 قلنا اللى عاوزينه فى كام ساعة حقيقية

 

 ماحدش دفع فلوس لخمسة وتلاتين مليون ارادة وطنية

 

 هو ده الصندوق من غير تزييف وتسويد مطابع اميرية

 

 ومن هنا ورايح حاتكون دى الشرعية

 

واى حاجة عاوزينها

 

 حانخرج كلنا فى ديمقراطية شعبية

 

 ما تستعجبوش يا جماعة

 

ياما علمنا البشرية

خواطر سوسنية (مصر 68)

احكى يا زمان احكى

ياللى رايح واللى جاى

 

 اقف هنا حيث 

 

 يتوقف دائما الزمان

 

 ياللى رايح واللى جاى

 

 احكى على شعب صابر

 

 بيتحاكوا على صبره

 

 اجيال وراها اجيال

 

 يفضل يراقب ويسكت

 

 ويقول بكره ربك

 

 حايعدل الاحوال

 

 يفضل يبكى لوحده

 

 ويشيل فى قلبه من الحزن جبال

 

 يقول مش مهم اللقمة

 

 تتدبر وماحدش يااخوانا

 

 بيبات هنا فى مصر جعان

 

 وفى لحظة واحدة يتوحد

 

 ايد واحدة كما الطوفان

 

 يقول ما بدهاش يا جماعة

 

 ايه فايدة الانسان

 

 لو خاف واصبح جبان

 

 ينادى على جيشه تعالى

 

 انقذنى من الغربان

 

 بينهشوا فيه حتة حتة

 

 ما بقاش عندى حاجة واحدة

 

 افخر بيها زى زمان

 

 وجيشنا ده يا جماعة حكاية

 

 رجالة معدن ما بقيناش نلقاه

 

 الوطن عنده حكاية

 

 مش عالربابة يا عمى بتتقال

 

 الوطن عنده راية

 

 بترفرف على وطن فرحان

 

 الوطن عنده ارض

 

 يفديها بروحه

 

 ودمه فدى الاوطان

 

 جيشنا ده لما افكر فيه

 

 عينى بتدمع وقلبى يتملى بالفخار

 

 واحس ان ضهرى محمى

 

 وفيه ناس سهرانه تفدينى

 

 واقدر انا بسلام-------انام

خواطر سوسنية (مصر 67)

(30 يونيه 2013)

مساء الفل والانوار اللى هالة

مصر النهارده فى أبهى حلة

وشعبها منور ولا كوبانية النور

 والهوا فى الشارع 

---ليه ريحة حلوة --

مساء الورد اللى النهارده فتح

فى كل شارع فى كل حتة

مصر النهارده عروسة شابة

 ولابسة التوب وحاطة الحنة 

والشعب كله كأنه واحد 

والملايكة عليهم باصة 

صحيح هما غلابة

 وفى وقت الجد 

----------ولاد جبابرة

خواطر سوسنية (مصر 66)

يا محنى ديل العصفورة ---------بلدنا حاتصبح منصورة

انا باشارك بالكلمة

يا ترى ده كفاية 

كان نفسى اعمل حاجة اكبر من كده

كان نفسى اشارك 

فى صنع بكره على أرضنا

حطيت فى بلكونتنا

علم مصر بلادى

وحطيت كارت احمر

بارفعه بالصوت العالى

نفسى اصحى الصبح بكره

القى مصر فى أبهى حلة

والتخلف الجاسم عليها

انتهى الى غير رجعة

نفسى اصحى الصبح بكره

القى مصر شابة وعفية

فرحانة ومزهزهة

بايدين شبابها القوية

نفسى اصحى الصبح بكره

الاقيها مصر حلوة وسعيدة

لقيت طريق جديد

للمستقبل اللى مش بعيد

علم وثقافة ومدنية

ديمقراطية حقيقية

----وحرية

واختفى الكدابين من طريقها

ومعاهم كل الضلالية

شبابك يا مصر مبدروين 

زى اللالئ الاصيلة

عاوزين يبنوا طوبة 

فى جدار امجادك العتيدة

يا محنى ديل العصفورة

بلدنا حاتصبح منصورة

وحانفرح فرحة من القلب

ونبتدى بداية جديدة 

خواطر سوسنية ( مصر 65)

ردا على خديجة خيرت الشاطر التى كتبت شعرا منثورا  تمجد  فى خطاب الرئيس 

 

 

ماقالش اى حاجة

 

 تصب فى مصلحة بلادى

 

 كل اللى قاله كلمتين

 

 اسماء قضاة واعلاميين

 

 النهارده رافعين عليه

 

 قواضى فى المحاكم

 

 لكن الحقيقة هو قال

 

 كل حاجة عن نظامه

 

 فشل وعجز والاحتمال

 

اصبح ضربا من الخيال

 

 وشماعة الفلول

 

 جاهزة لكل المشاكل

 

 وانا القائد الاعلى للجيش

 

 فكرنا كتير بالفرعون

 

 لما قال للمصريين

 

 ربكم الاعلى مين

 

 فرعونكم اسجدوا ليه

 

 وكت النتيجة ايه

 

 مش ضرورى اقول

 

 انت ما شلتش فتيل الازمة

 

 انت سكبت على النار بنزين

 

 مش كان الاولى

 

 توفر لنا احنا البنزين 

 

 وتوفر السولار

 

 للفلاح المسكين 

 

واصحاب التوتوك حبايبك

 

 مش لاقيين 

 

والا الكهربا

 

 بتيجى ساعة وتقطع ساعتين

 

 الشعب بيغلى منك

 

 وكأنك مش عايش هنا

 

 واسوار القصر عليت 

 

 حجبت عليك شعبنا

 

 وحدت الكل ضدك

 

 والكل بقى عدوك

 

 وخلاص ما حدش قبلك

 

 ارحلوا بقى بالذوق

 

 وجنبوا بلدنا

 

 الصدام بالنبوت

 

 ده المصرى زمان زمان

 

 طرد 3 دول من بورسعيد

 

 طلعت عليهم الستات

 

 بالحلل والنبابيت

 

 يعنى المصرى مش جبان

 

 وبيقابل الموت ويقول له

 

 اهلا بيك

 

 لا بد حاترحلوا

 

 بعد الفشل الاكيد

خواطر سوسنية(مصر 64)

رئيسنا سوابق سوابق سوابق

 تخابر وهارب من السجون

 خرج ويا زملاته

 من سجن وادى النطرون

 وقال ده الاهالى خرجونا

 وانكر حماس المجرمين

 هتكوا امن بلادنا

 وخرجوا المساجين

وجابوها فى العادلى

 وقالوا دى الخطة ج

 وقناصتهم قنصت

 الشهدا فى التحرير

 وقالك دى موقعة الجمل

 والجمل منها برئ

 الجمل كان فى العصرية

 وهروهم ضرب المفترية

 والشهداء كانوا بالليل

 قنصا من اسطح ملالية

 لكن ربك كبير

 ما يرضاش بالظلومة ديا

 ومهما اتأخرت الحقيقة

 مسيرها تظهر واضحة جلية

 ربك بيمهل الظالم

 ويمدله فى الحنية

علشان لما يجيبه

 على جدور رقبته

 تبقى الوقعة قوية

 وفاضلهم فى السلطة ثوانى

 يفوتها ربك عليا

عاوزين نفوق بقى

 للتحديات الجاية

خواطر سوسنية( مصر 63)

مفيش فايدة --مفيش فايدة

 مصر رايحة لمصيرها المحتوم

 وهذا النظام لا بد من خلعه

 وخلاص ما ينفعش يقعد ولا يوم

 مصر مش فى ايد امينة

 وبتتدهور يوم عن يوم

 والقرارات العليا فيها

 مش عارفينها بتتاخد ازاى

 وقرارات الحرب يا با

 بتتاخد من الاستاد

 وسوريا اللى هى توأمنا

 قال ايه بنقطع معاها العلاقات

 وبدل ما نقف جنب سوريا

 ونحافظ عليها  من الانهيار

 قوم نشجع الارهاب

وعاوزين نسقط بشار

 والا صفوت وتصريحاته الخايبة

 على تسريب سلاح وقال ايه ثوار

 حايدخل مصر فى متاهة سودة

 حاتخلينا ارهابيين كبار

 وبلدنا تبقى افغانستان تانية

 ونتحط فى القوائم السوداء

  مفيش فايدة فى نظام فاشل

 مش عارفين بيعمل لمصلحة مين

 والاخر قبل ما يمشى

 بيزود  البلة على الطين


وحاطط لنا محافظ

 كان يوم من المجرمين

 والباقى كله اخوان

 حايطردوا من مناصبهم قريب

  عاوزين يوم الخلاص

 يجيى لنا قولوا امين 

 وبلدنا ترجع دولة 

 تانى ليوم الدين

خواطر سوسنية(مصر 62)

ماذا سيحدث للعالم

 اذا خلى من كلماتى

 الارض ستظل تدور

 بدون كلماتى
 
والشمس ستطلع كل صباح

 بدون كلماتى

 ومصر ستظل تدور فى دوائر بلا نهاية

 بدون كلماتى

 سيخرج وليد

 ويموت من كتب عليه الموت

 والقمح الاصفر فى سنبله

 سيطل علينا بالفرح

 ستذهب طفلة الى المدرسة اول مرة

 وستبنى نحلة بيتا للعسل 

 وستغرد عصفورة فرحة بالضوء

 بدون كلماتى

 سيحلم شاب بعروسه

 والبيت الدافئ والمستقبل

 بدون كلماتى

 ما فائدة الحرف اذا خلا يوما

 من الصدق او الحقيقة

 ما فائدة كلماتى

 اذا ضاعت بين حروف

 الكذب والخداع والنفاق
 
اكتب بدمى بدون مداد

 واعتصر نفسى فى كلمات

 املة ان يتغير اى شئ 

 لكن ماذا تفعل كل الكلمات

 فى زيف وخداع وتملق وبذاءات

 ماذا تفعل كلمات مستقيمة

 فى كل هذه الالتواءات

 انا لن اتنازل عن افكارى

 لكى تنشر تعليقاتى 

 ولن اتوسل من اجل النشر

خواطر سوسنية ( مصر 61)

مبروك يا اخواتنا واهالينا 

 ولادنا اهم رجعم لينا

 نقابلكم بدموع وشموع 

ولا بفرحة فى عينينا

كنا بنموت فى اليوم ميت مرة

 من خوفنا عليكم 

 من عارنا

وربنا رأف بينا

 فوق الكل نصرنا

 وجيشنا حبيبنا حرركم

 من غير ما يتمس لكم شعرة

 رجالة رافعة راسنا

 لكل مؤامرة واقفة
 
لكن ياناسنا واهالينا

 ما ينفعش ما  بيحصل فى سينا

 سينا لا بد تتحرر 

 من ايد الارهاب الخونة

 سينا لا بد تتعمر 

 خضرة ---مصانع ---بالفرحة

 مش معقول بعد الدم الغالى 

 و120 الف شهيد 

 نسيب سينا تعانى 

 تسكنها الاشباح وتبيد

 كل امالنا واحلامنا 

تزرعها موت وخراب وحديد

 شيلوا الانفاق من سينا 

 شيلوا كل سلاح الغدر
 
 خرجوا منها الارواح الشريرة 

 وابدروا بدلا منهم فجر

 شباب وبنات عاوزه تلاقى 

 مستقبل ---وامانى ----وحب

  سينا يااخوانا نقطة بدء 

 مش اقليم وهمى بيتمد

  سينا اكبر من اسرائيل وفلسطين 

 والعين عليها سنين وسنين 

 من اليوم خطة جديدة
 
نزحف بيها على سينا

 دى اغلى ارض فى ايدينا 

 مروية بدمائنا وفلذة كبدينا

 لازم نصحى بقى ونقوم 

 ونعمل واجب اللى علينا

 كفاية دواير بندور فيها

 واتلخبط فيها راسنا ورجلينا