طاقية وجلابية..حجاب والا نقاب
طاقية وجلابية
حجاب والا نقاب
مش هى دى القضية
عاوزين ناكل يا ناس
***
البنت نجوزها تسعة
والا اتناشر تمام
والختان واجب وسنة
والا هو اختيار
جيش وشرطة بدقونهم
والا ده اخلال
طب ليه التجنيد اجبارى
ما نخليه زى زمان
والمحكمة الدستورية
ايه لزمتها كمان
دى مصاريف عالفاضى
يلا نلغيها قوام
يلا نرفع الادان
هى الجلسات يعنى تمنع
شرع الله فى الاوان
***
طاقية وجلابية
حجاب والا نقاب
مش هى دى القضية
عاوزين ناكل يا ناس
***
الدستور خليه شوية
لما نخلص انتخاب
ونشوف مين حايجى
حد منا والا فاتنا
أهم كرسى فى البلاد
وتصريحات يا ما رهيبة
بعدين نقول ده الاعلام
وكل شوية نقف نزعق
ونقول حكومة اى كلام
ولما الموازنة تيجى
نقول ارقام مش تمام
ولما يقدمولنا خطة
للسنين الجاية كمان
نقولهم وانتم مالكم
تلاتين ستة جاى قوام
امشوا بقى وسيبولنا
البلد بين ايدينا
حاتشوفوا حاجات حلوة
والخير ازاى ماليها
***
اعملوا معروف فينا
ما تدخلوناش متاهات
ده احنا شفنا سنين طويلة
ذل وقهر واهانات
عاوزين مستقبل يجيى
مليان بسمات
مليان علم وعمل
مش خرافات وصراعات
***
طاقية وجلابية
حجاب والا نقاب
مش هى دى القضية
عاوزين ناكل يا ناس
عاوزين تسكنونا
مساكن ادمية
وولادنا دول يروحوا
مدارس الزامية
يتعلموا فيها
مناهج حقيقية
عاوزين مشروعات
وحاجات استثمارية
علشان نلاقى شغلة
لكل العواطلية
عاوزين ميه نضيفة
حلوة زى زمان
عاوزين الشمس تطلع
تنور عالغيطان
وسنابل قمح ياما
فاضت..صدرناها كمان
عاوزين خيرنا اللى
اتحرمنا منه زمان
***
طاقية وجلابية
حجاب والا نقاب
مش هى دى القضية
عاوزين ناكل يا ناس
***************************
ليست هناك تعليقات:
إرسال تعليق